• 15 қыркүйек 2026
• 21

ЖУРНАЛИСТЕРГЕ «КІТАП ОҚИТЫН ҰЛТ» ЖОБАСЫНЫҢ МАҢЫЗДЫЛЫҒЫ ТҮСІНДІРІЛДІ

Қорқыт ата атындағы Қызылорда университетінде «Қазақ тілі мен әдебиеті және журналистика» білім беру бағдарламасының студенттеріне «Кітап оқитын ұлт» жобасының маңыздылығы түсіндірілді.

Жиында университеттің Әлеуметтік және тәрбие жұмыстары жөніндегі проректоры Уәлихан Ибраев студенттерге республикалық марафонның кітап оқуға деген қызығушылықты арттырудағы маңызына тоқталды. Оның айтуынша, тұрақты кітап оқу – адамның ой-өрісін кеңейтіп қана қоймай, кәсіби шеберлігін арттыруға да ықпал ететін маңызды дағды.

– Кітап оқу – адамның интеллектуалдық әлеуетін арттыратын ең тиімді құралдардың бірі. Күн сайын аз уақыт болса да кітап оқуға дағдылану маңызды. Ең бастысы – тұрақтылық пен ерік-жігер. Бүгін қалыптасқан оқу дағдысы ертең кәсіби білікті маман болуға жол ашады, – деді проректор.

Кездесу барысында «Қазақ тілі мен әдебиеті және журналистика» білім беру бағдарламасының аға оқытушысы Аякөз Абдразақова кітап оқудың болашақ мамандар үшін маңызына тоқталды. Журналистика саласында білім алатын студенттер үшін кітап оқудың ойлау қабілетін дамытуда, сөздік қорды байытуда және кәсіби сауаттылықты арттыруда ерекше рөл атқаратынын айтып, студенттерді кітап оқитын жастардың қатарынан болуға үндеді.

Кездесу соңында білім алушыларға кітап оқуды күнделікті өмір салтына айналдырып, «Кітап оқитын ұлт» жобасы аясындағы марафонға белсенді қатысуға шақырды.