• 16 қыркүйек 2026
• 19

ҚОРҚЫТ АТА УНИВЕРСИТЕТІНІҢ ӨКІЛІ ҚЫТАЙДАҒЫ ХАЛЫҚАРАЛЫҚ СЕМИНАРҒА ҚАТЫСТЫ

Қорқыт ата атындағы Қызылорда университетінің Құқықтық қамтамасыз ету және мемлекеттік сатып алу басқармасының басшысы Самал Ілиясова Қытай Халық Республикасында екі апта бойы өткен «БҰҰ-ның орнықты дамуы саласындағы Қытай тәжірибесі: зияткерлік өндіріс және өнеркәсіптік инновациялар» атты халықаралық семинарға қатысты.

Семинар барысында қатысушылар жасанды интеллект, робототехника, зияткерлік өндіріс, 5G технологиялары, 3D басып шығару және орнықты даму бағыттары бойынша дәрістер тыңдап, Қытайдың жетекші университеттері мен ұйымдарының тәжірибесімен танысты.

Бағдарламаның практикалық бөлімінде технологиялық компаниялар, зертханалар, өндіріс орындары және цифрлық ауыл шаруашылығы нысандарына сапарлар ұйымдастырылды.

Қатысушылар жасанды интеллект пен робототехниканың өндірісте қолданылуын көріп, сүңгуір робот, робот-балық секілді заманауи технологиялармен танысты.

Семинарда Қытайдың «Жасыл таулар мен мөлдір сулар» қағидаты, қалаларды көгалдандыру тәжірибесі және жасанды интеллектінің болашақ еңбек нарығына ықпалы да талқыланды.

Сонымен қатар жоғары білім беруде жасанды интеллект пен оқытушының цифрлық бейнесін пайдалану мүмкіндіктері қарастырылды.

Сапар аясында қатысушылар Шанхай, Циндао және Ханчжоу қалаларында болып, Қытайдың тарихи-мәдени орындарымен де танысты.