• 25 қыркүйек 2026
• 65

ҰЛТ РУХЫНЫҢ ЖАНАШЫРЫ – МАРДАН БАЙДІЛДАЕВТЫҢ 100 ЖЫЛДЫҒЫНА АРНАЛҒАН КОНФЕРЕНЦИЯ ӨТТІ

Қорқыт ата атындағы Қызылорда университетінде ғалым, фольклор зерттеушісі Мардан Байділдаевтың туғанына 100 жыл толуына орай «Ұлт рухының жанашыры» атты республикалық ғылыми-тәжірибелік конференция өтті.
Конференция басталмас бұрын жиынға қатысушылар Маңғыстау облысындағы қайғылы оқиға салдарынан қаза тапқан әскери қызметшілерді бір минут үнсіздікпен еске алып, рухына тағзым етті.
Қызылорда облысы әкімдігінің ұйымдастыруымен өткен ғылыми жиынның мақсаты – ұлттық фольклор мен әдеби мұраны жинақтап, зерттеуге және ғылыми айналымға енгізуге елеулі үлес қосқан ғалымның мұрасын зерделеу және насихаттау.

Конференцияға облыс әкімінің орынбасары Қайрат Нұртай, ғалымдар, профессор-оқытушылар мен зиялы қауым өкілдері қатысты.
Жиында Мардан Байділдаевтың ғылыми-зерттеушілік қызметі, Сыр өңірінің әдеби-мәдени мұрасын жинақтау мен жүйелеудегі еңбегі сөз болды. «Айтыс ақындары мен жыршы-термешілердің халықаралық одағы» қоғамдық бірлестігі төрағасының бірінші орынбасары, филология ғылымдарының докторы Аманжол Әлтай зерттеушінің фольклорлық мұраны жинаумен қатар, оны саралап, ғылыми айналымға енгізудегі еңбегіне тоқталды.
Сонымен қатар ғалымның Алаш қайраткерлері мен саяси қуғын-сүргін құрбандарының мұрасын жаңғырту бағытындағы қызметі туралы пікірлер айтылды. Өлкетанушы, қоғам қайраткері Бекарыстан Боранқұлұлы Мардан Байділдаевтың Тұрмағанбет Ізтілеуовті ақтау жолындағы азаматтық ұстанымын атап өтті.

Конференция барысында Қызылорда Ашық университетінің ректоры, техника ғылымдарының докторы, профессор, ҚРҰлттық ғылым академиясының Академигі Қылышбай Бисенов сөз сөйледі. Сонымен қатар, Қорқыт ата атындағы Қызылорда университетінің ғалымдары Ғабит Әнешұлы мен Гүлзира Сапарқызы Сыр сүлейлерінің шығармашылығы және зерттеушінің ғылыми мұрасы жөнінде баяндама жасады. Ал филология ғылымдарының кандидаты, тұрмағамбеттанушы Ләйлі Құндықбай ғалымныңТұрмағамбет Ізтілеуов шығармашылығын зерттеудегі еңбегіне тоқталды.
Мардан Келдібайұлының Сыр бойындағы Тұрмағамбет, Шораяқтың Омары, Қарасақал Ерімбет, Кете Жүсіп, Қаңлы Жүсіп, Даңмұрын сынды ақындардың шығармаларын жинақтап, зерттеуге айрықша үлес қосты. Оның ғылыми мұрасы Сыр өңірінің әдеби-фольклорлық мұрасын жүйелі зерделеуге негіз болды.
Конференция қорытындысында ғалымның ұлттық руханиятты сақтау мен кейінгі ұрпаққа жеткізудегі еңбегінің маңызы атап өтіліп, зерттеуші мұрасын одан әрі ғылыми тұрғыдан зерделеу мәселелері талқыланды.

Қорқыт ата атындағы Қызылорда университетінің медиа орталығы