• 29 қыркүйек 2026
• 11

КЕҢЕСТІК КЕЗЕҢДЕГІ СОПЫЛЫҚ ДӘСТҮР: ЗЕРТТЕЛУІ МЕН ӨЗЕКТІ МӘСЕЛЕЛЕРІ ТАЛҚЫЛАНДЫ

Қорқыт ата атындағы Қызылорда университетінде «Кеңестік кезеңдегі сопылық дәстүр: зерттелуі мен өзекті мәселелері» тақырыбында халықаралық ғылыми-тәжірибелік конференция өтті.

Ғылыми басқосу Қазақстан Республикасы Ғылым және жоғары білім министрлігі Ғылым комитетінің 2024–2026 жылдарға арналған гранттық қаржыландыруы аясында жүзеге асырылып жатқан AP22787282 «Советтік Қазақстандағы сопылық: Ясауилік және ишандық дәстүр тарихы мысалында» ғылыми жобасы негізінде ұйымдастырылды.

Конференция жұмысына университеттің Әлеуметтік және тәрбие жұмыстары жөніндегі проректоры Уәлихан Ибраев, отандық және шетелдік ғалымдар, сарапшылар, зерттеушілер, дін өкілдері мен білім алушылар қатысты. Іс-шараны Ғылыми зерттеулерді үйлестіру бөлімінің басшысы Нұрлыбек Мыңжас жүргізді.

Халықаралық конференцияда Қожа Ахмет Ясауи атындағы Халықаралық қазақ-түрік университетінің Дінтану кафедрасының профессоры, философия және теология ғылымдарының докторы Досай Кенжетаев, Анкара университеті Теология факультетінің профессоры, ғылым докторы Сейфеттин Ершахин, Қырғыз-Түрік «Манас» университеті Әлеуметтану кафедрасының және Болу Абант Иззет Байсал университеті Саяси тарих кафедрасының профессоры, ғылым докторы Али Яман баяндама жасады.

Сонымен қатар Нұр-Мүбарак университетінің Ғылым және халықаралық байланыстар департаментінің директоры, филология ғылымдарының докторы, профессор Керім Шәмшәдин, Өзбекстан Ұлттық архивінің аға ғылыми қызметкері, тарих ғылымдарының докторы, профессор Мухайе Исакова, Қ. Жұбанов атындағы Ақтөбе өңірлік университетінің «Музыка және хореография» кафедрасының аға оқытушысы, Юнус Раджаби атындағы Өзбек ұлттық музыка өнері институтының тәуелсіз ізденушісі Арайлым Алиева және Қорқыт ата атындағы Қызылорда университетінің «Тарих және археология» білім беру бағдарламасының қауымдастырылған профессоры, философия докторы (PhD) Талғат Жолдасұлы зерттеу нәтижелерін таныстырды.

Конференция жұмысы екі секция бойынша өтті. Бірінші секцияда «Советтік кезеңдегі дін саясаты және сопылық-ишандық дәстүр: тұлғалар, институттар және зерттеу мәселелері» тақырыбы талқыланса, екінші секция «Сопылық-ишандық мұраның тарихи-мәдени сабақтастығы: ағартушылық, әдебиет және рухани мұра» бағытына арналды.

Талқылаулар барысында кеңестік кезеңдегі дін саясатының ерекшеліктері, сопылық және ишандық дәстүрдің қалыптасуы мен даму тарихы, діни тұлғалардың қоғамдық қызметі, сондай-ақ рухани мұраны ғылыми тұрғыдан зерделеу және сақтау мәселелері қарастырылды.

Халықаралық ғылыми басқосу ғалымдар арасында тәжірибе және ғылыми пікір алмасуға, кеңестік кезеңдегі сопылық дәстүрді зерттеудің жаңа бағыттарын айқындауға және отандық әрі шетелдік зерттеушілер арасындағы кәсіби ынтымақтастықты нығайтуға мүмкіндік берді.

Қорқыт ата атындағы Қызылорда университетінің медиа орталығы