• 30 қыркүйек 2026
• 71

AI MONTH: KYZYLORDA HUB-ТА ГЕНЕРАТИВТІ ЖИ БОЙЫНША ВОРКШОП ӨТТІ

Kyzylorda Hub бизнес-инкубаторының алаңында AI Month аясында жасанды интеллект құралдарын практикалық қолдануға арналған AI Workshop өтті. Іс-шараға 40-қа жуық қатысушы қатысып, генеративті жасанды интеллект мүмкіндіктерін күнделікті жұмыс пен оқу үдерісінде тиімді пайдаланудың практикалық тәсілдерін меңгерді.
AI Workshop-тың негізгі мақсаты — қатысушыларды генеративті жасанды интеллекттің заманауи құралдарымен таныстырып қана қоймай, оларды нақты міндеттерді орындау барысында қолдану дағдыларын қалыптастыру. Бағдарлама практикалық форматта ұйымдастырылып, қатысушылар теориялық ақпаратты бірден тапсырмаларды орындау арқылы бекітті.
Воркшоп барысында қатысушылар жасанды интеллектке тапсырманы дұрыс қоюдың негізгі қағидаларымен танысты. Атап айтқанда, сапалы нәтиже алу үшін промптты нақты құрастыру, тапсырманың мақсатын дұрыс сипаттау және қажетті контексті ұсыну тәсілдері қарастырылды.

Іс-шара барысында бірнеше негізгі бағыт қамтылды:
●Генеративті жасанды интеллект негіздері — AI мүмкіндіктері және оны күнделікті міндеттерді орындауда пайдалану жолдары;
●Промптинг — жасанды интеллектке нақты тапсырма беру және сапалы нәтиже алу тәсілдері;
●Рутиналық жұмыстарды автоматтандыру — мәтіндермен, ақпаратпен және құжаттармен жұмыс істеуді жеңілдету;
●Контент жасау — AI көмегімен мәтіндік және визуалды контент әзірлеу мүмкіндіктері;
●Практикалық жұмыс — қатысушылар AI құралдарын қолданып, нақты тапсырмаларды өздері орындады.
Бағдарламаның практикалық бөлігінде қатысушылар жасанды интеллект құралдарын пайдаланып, мәтін әзірлеу, ақпаратты өңдеу, визуалды материалдар дайындау және жұмыс үдерістерін оңтайландыру тәсілдерін тәжірибеде сынап көрді.

Kyzylorda Hub-та AI Workshop форматы тұрақты түрде өткізіліп, әртүрлі мақсатты аудиторияларға бейімделіп келеді. Воркшоптар студенттерге, оқушыларға, педагогтерге, кәсіпкерлерге, мамандарға және жасанды интеллект мүмкіндіктерін өз қызметінде қолданғысы келетін басқа да қатысушыларға арналған форматта ұйымдастырылады.
Әртүрлі аудиториялармен жұмыс істеу барысында бағдарламаның мазмұны қатысушылардың қажеттіліктеріне қарай бейімделеді. Мысалы, педагогтер үшін AI құралдарын білім беру үдерісінде қолдануға, кәсіпкерлер үшін бизнес міндеттерін оңтайландыруға, ал студенттер мен жастар үшін оқу, контент жасау және жеке жобаларды дамытуға қатысты практикалық кейстерге басымдық беріледі.
AI Month аясындағы бұл воркшоп Kyzylorda Hub-тың өңірде жасанды интеллект бойынша практикалық білім мен цифрлық құзыреттерді дамытуға бағытталған жұмысының бір бөлігі болды.
Kyzylorda Hub жасанды интеллект бағытындағы білім беру іс-шараларын алдағы уақытта да жалғастырып, қатысушыларға AI құралдарын тек танып-білумен шектелмей, оларды нақты жұмыс, оқу және жобалық міндеттерді шешуде тиімді пайдалануға мүмкіндік беретін практикалық бағдарламаларды тұрақты түрде ұйымдастырады.

Қорқыт ата атындағы Қызылорда университетінің медиа орталығы