• 30 қыркүйек 2026
• 17

СТУДЕНТТЕР БЕЛГІЛІ ЖУРНАЛИСТ РУСЛАН ӨТЕПБАЙМЕН КЕЗДЕСТІ

Қорқыт ата атындағы Қызылорда университетінде Қызылорда қаласы әкімдігі мен қалалық прокуратураның ұйымдастыруымен «Заң. Тәртіп. Жауапкершілік» тақырыбында жастармен кездесу өтті.
Басқосу жастардың құқықтық білімін жетілдіру, заң талаптарына құрметпен қарауын қалыптастыру және қоғам алдындағы жауапкершілігін арттыру мақсатында ұйымдастырылды. 
Кездесуге қала прокурорының орынбасары Ерлан Алмаханов, журналист Руслан Өтепбай, қалалық қоғамдық даму бөлімінің басшысы Жағыпар Тажмаханов, Қызылорда облыстық адвокаттар төралқасының төрағасы Мейірбек Даубалаев, жайдарманшы Асылхан Дүкенбаев қатысты.

Жиын барысында спикерлер заңға бағыну, құқықтық сауаттылық, қоғамдық тәртіп және заң алдындағы жауапкершілік мәселелеріне тоқталды. Мамандар жастарға күнделікті өмірде заң талаптарын сақтаудың маңызын түсіндіріп, кәсіби қызметі барысында кездескен түрлі оқиғалар мен тәжірибелерімен бөлісті.
Сондай-ақ кездесуде соңғы уақытта қоғамда өзекті мәселелердің біріне айналған дропперлік қылмыс туралы кеңінен сөз болды. Спикерлер жастарға өздерінің банк карталары мен есепшоттарын бөгде адамдарға берудің, күмәнді қаржылық операцияларға қатысудың құқықтық салдары жөнінде түсіндірме беріп, заңсыз әрекеттерден сақ болуға шақырды.

Кездесудің негізгі спикері, журналист Руслан Өтепбай журналистік зерттеулері мен кәсіби тәжірибесі негізінде жастарға бірқатар маңызды мәселелер жөнінде ой бөлісті. Ол жастардың ақпаратты сыни тұрғыдан қабылдауы, жауапкершілікпен әрекет етуі және кәсіби ортада адалдық пен заң талаптарын ұстануының маңыздылығына тоқталды. Сонымен қатар журналистика саласына қызығушылық танытқан студенттерге кәсіби бағыт-бағдар беріп, өз тәжірибесімен бөлісті.
Кездесу барысында студенттер спикерлерге өздерін қызықтырған сауалдарын қойып, құқықтық тақырыптар төңірегінде еркін форматта пікір алмасты.

Қорқыт ата атындағы Қызылорда университетінің медиа орталығы