• 02 қазан 2026
• 28

ХАЛЫҚАРАЛЫҚ ҒЫЛЫМИ ЖӘНЕ АКАДЕМИЯЛЫҚ ЫНТЫМАҚТАСТЫҚ МӘСЕЛЕЛЕРІ ТАЛҚЫЛАНДЫ

Қорқыт ата атындағы Қызылорда университетінің Басқарма мүшесі – Академиялық мәселелер жөніндегі проректор Дана Абдрашева К.Д. Ушинский атындағы Ярославль мемлекеттік педагогикалық университетінің өкілдерімен кездесті.
Кездесуге М.В. Дорогов атындағы фармацевтикалық технологиялар трансфері орталығының директоры, химия ғылымдарының докторы, профессор Михаил Корсаков, орталық басшысы, химия ғылымдарының кандидаты, доцент Антон Шетнев, «Физика-химиялық талдау әдістері» инженерлік бейіндегі зертханасының бас ғылыми қызметкері, химия ғылымдарының кандидаты, профессор Нұрбол Аппазов және Халықаралық байланыстар бөлімінің басшысының міндетін атқарушы Шерхан Бітімбай қатысты.

Келіссөздер барысында екі жоғары оқу орны арасында педагогикалық білім беру және ғылыми-зерттеу қызметі бағыттары бойынша ресми ынтымақтастық орнату мәселелері қарастырылды. Тараптар академиялық тәжірибе алмасу, бірлескен зерттеулер жүргізу және ғылыми жобаларды іске асыру мүмкіндіктерін талқылады.
Дана Абдрашева ынтымақтастықтың басым бағыттарын айқындау мақсатында тараптардың нақты ұсыныстар әзірлеуінің маңыздылығын атап өтті. Өзара ұсыныстар сараланғаннан кейін екі университет басшыларының кездесуін ұйымдастыру және әріптестікті ресми негізде дамыту жоспарланды.

Шетелдік ғалымдардың сапары «Физика-химиялық талдау әдістері» инженерлік бейіндегі зертханасымен бірлесіп жүзеге асырылған «Биомедициналық қолдану үшін циклдік амидин жүйелерінің және олардың табиғи қышқылдармен конъюгаттарының дизайны, синтезі және химиялық трансформациясы» тақырыбындағы ғылыми жобаның қорытынды есебін талқылауға бағытталды.
Басқосу қорытындысында тараптар ғылыми және академиялық байланыстарды нығайтуға, сондай-ақ өзара тиімді бастамаларды іске асыруға мүдделі екендерін білдірді.

Қорқыт ата атындағы Қызылорда университетінің медиа орталығы