• 24 сәуір 2026
• 48

ШЫМКЕНТТЕ «ZIYATKER | SHYMKENT» БАЙҚАУЫНЫҢ ҚАЛАЛЫҚ КЕЗЕҢІ ӨТТІ

Қорқыт ата атындағы Қызылорда университетінің ұйымдастыруымен Шымкент қаласындағы Жастар орталығында «ZIYATKER | SHYMKENT» интеллектуалдық байқауының қалалық кезеңі өтті.

Байқаудың алғашқы, мектепішілік кезеңіне Шымкент қаласының мектептерінен 800-ге жуық 10–11 сынып оқушысы қатысып, онлайн форматта білімдерін сынады. Іріктеу қорытындысы бойынша жоғары нәтиже көрсеткен 324 оқушы қалалық кезеңге жолдама алды.

Іс-шараның ашылу салтанатына Шымкент қаласы Білім басқармасының Әдістемелік орталығының директоры Әшірбек Абытұлы мен Жастар орталығының директоры Жансерік Жұманұлы қатысып, жас зияткерлерге сәттілік тіледі. Сонымен қатар білім мен интеллектуалдық дамуға бағытталған жобалардың маңыздылығын атап өтті.

Байқаудың негізгі ұйымдастырушысы әрі жүргізушісі Жандос Шынжырбайұлы қатысушыларды сайыстың келесі кезеңдерімен таныстырып, жоғары нәтиже көрсеткен оқушылардың телевизиялық кезеңде бақ сынайтынын жеткізді.

Қалалық кезеңде қатысушылар эрудициялық және интеллектуалдық тапсырмаларды орындап, логикалық ойлау қабілеттерін, білім деңгейлерін және жылдам шешім қабылдау дағдыларын көрсетті.

Байқау қорытындысы бойынша ең жоғары ұпай жинаған 48 қатысушы 1/8 финалдық телевизиялық кезеңге жолдама алады. Келесі кезеңдер "Ontustik TV" телеарнасында түсіріліп, көрермендерге эфир арқылы ұсынылады.

Жоба жеңімпаздарына Қорқыт ата атындағы Қызылорда университетінің білім гранттары табысталып, бас демеуші Eduser компаниясы тарапынан құнды сыйлықтар берілмек.

Айта кетейік, «ZIYATKER | SHYMKENT» интеллектуалдық байқауының басты мақсаты – білімді, ізденімпаз және дарынды жастарды анықтау, олардың интеллектуалдық әлеуетін дамыту, оқушылардың білімге деген қызығушылығын арттыру және зияткерлік мәдениетті қалыптастыру. Жобаның негізгі ұйымдастырушысы – Қорқыт ата атындағы Қызылорда университеті, ал серіктестері – Ontustik TV телеарнасы, Шымкент қаласы Білім басқармасының Әдістемелік орталығы және Жастар орталығы. Байқаудың бас демеушісі – Eduser компаниясы.

Қорқыт ата атындағы Қызылорда университетінің медиа орталығы