• 13 қазан 2026
• 54

ШВЕЦИЯЛЫҚ ЖУРНАЛИСТ АРАЛ ТЕҢІЗІ ТУРАЛЫ БЕЙНЕФИЛЬМ ТҮСІРУДІ ЖОСПАРЛАУДА

Қорқыт ата атындағы Қызылорда университетінің Басқарма мүшесі – академиялық мәселелер жөніндегі проректоры Дана Абдрашева Швеция Журналистер клубының мүшесі, журналист-эколог Томас Эриксонмен кездесті. 

Арал теңізінің тарихы мен қазіргі экологиялық жағдайын зерттеу мақсатында өңірге келген шетелдік журналист теңіз мәселесін халықаралық ақпарат кеңістігінде кеңінен танытуға қызығушылық білдірді. Кездесу барысында Арал өңіріндегі экологиялық ахуалды зерделеу, оның тарихи қалыптасуы мен қазіргі жай-күйін ақпараттық тұрғыдан көрсету, сондай-ақ жаһандық аудиторияның назарын аймақтың экологиялық мәселелеріне аудару бағыттары талқыланды.
Томас Эриксон алдағы уақытта Арал теңізінің өткені мен бүгінін, экологиялық өзгерістердің ауқымы мен салдарын қамтитын деректі бейнефильм түсіруді жоспарлап отырғанын жеткізді. Сонымен қатар журналист Арал мәселесіне арналған материалдарды халықаралық журналдарда жариялау арқылы тақырыптың ауқымын кеңейтуді көздейтінін атап өтті.

Кездесу барысында Арал теңізінің экологиялық проблемаларын халықаралық деңгейде ақпараттық сүйемелдеу, өңірдің тарихы мен қазіргі жағдайын кеңінен таныту және қоғам назарын қоршаған ортаны қорғау мәселелеріне аудару мүмкіндіктері сөз болды.

Қорқыт ата атындағы Қызылорда университетінің медиа орталығы