• 23 қазан 2026
• 14

«ДОКТОРАНТТАРҒА ҒЫЛЫМИ ЖЕТЕКШІЛІК ЕТУ ТӘЖІРИБЕСІН НЫҒАЙТУ» КУРСЫ ӨТУДЕ

Қазақстан Республикасы Ғылым және жоғары білім министрлігі Ғылым және жоғары білім саласындағы сапаны қамтамасыз ету комитетінің қолдауымен Назарбаев Университеті Жоғары білім беру мектебі «Academic Leadership Institute: Докторанттарға ғылыми жетекшілік ету тәжірибесін нығайту» курсын өткізуде.
Курс бағдарламасы 3 кезеңнен тұрады. Бағдарламада докторантурадағы білім беру жүйелері мен контекстері, ғылыми жетекшілік тәжірибесі мен зерттеу дизайны, институционалдық зерттеу және Қазақстан университеттеріндегі әлеуметтік-гуманитарлық ғылымдар бойынша ғылыми жетекшілік тәжірибесін жетілдіруге басымдық берілген.
Аталған оқыту курсына Қорқыт Ата атындағы Қызылорда университетінен п.ғ.к., доцент Баянәлі Досжанов, PhD Акерке Жолмаханова және PhD, қауымдастырылған профессор Эльмира Уайдуллақызы қатысуда.

Бірінші кезеңнің модульдері «Докторлық білім беру және ғылыми жетекшілік», «Басқару тәжірибесі және зерттеу дизайны», «Ғылыми зерттеуді басқару және зерттеу дизайны» тақырыптарын қамтыды.
Бағдарлама барысында Назарбаев Университеті Жоғары білім беру мектебінің деканы Аида Сағынтаева, Қазақстан Республикасы Ғылым және жоғары білім министрлігі Ғылым және жоғары білім саласындағы сапаны қамтамасыз ету комитетінің төрағасы Әділет Жүнісұлы Тойбаев еліміздегі докторлық білім беру реформасын басқару және осы саладағы бірқатар проблеманың алдын алу мәселелерін қарастырды. Назарбаев Университетіндегі докторлық білім беру тәжірибесі туралы Dr. Jason және Dr. Shazim Memon баяндама жасады. Professor Daniel Torrano, Professor Zumrad Katayeva, Professor Eva Riethmacher, Professor Annie Ng және қауымдастырылған профессор Ерназар Абдикамалов докторанттарға ғылыми жетекшілік ету бағыттары мен Назарбаев Университетінің тәжірибесін таныстырды.

Назарбаев Университетінің түлегі Мағжан Аманғазы мен Жоғары құқық мектебі деканының орынбасары Ольга Лозовая ChatGPT және Codex құралдарын зерттеу үдерісінде идеядан жарияланымға дейін пайдалану мәселелері бойынша баяндама жасады. Dr. Shazim Memon және Dr. Samantha Smidt докторанттарға тиімді қолдау көрсету тәжірибесі туралы ақпарат ұсынды. Назарбаев Университетінің түлегі Ботагөз Испамбетова Қазақстан университеттерінде докторлық қауымдастықтар құру мәселесін таныстырды.
Сонымен бірге, Назарбаев Университеті кітапханасының ғылыми зерттеулерді қолдау бөлімінің меңгерушісі Елизавета Камилова зерттеу бағыттарын айқындау және ғылыми әдебиеттерді іріктеу бойынша ақпарат ұсынды. Гүлфия Күшімова зерттеу дизайнын әзірлеуді басқару және әдістемені таңдау мәселелеріне талдау жасады. Назарбаев Университетінің постдокторанты Асия Амеркеновна Ермухамбетова Қазақстандағы докторанттарға ғылыми жетекшілік ету бойынша институттардың тәжірибесімен бөлісті.
Модуль соңында ұсынылған материалдарды бекітуге арналған рефлексиялық және синтездік воркшоп өткізілді.
Оқыту курсы әрі қарай екінші және үшінші кезеңдермен жалғасады.

Қорқыт ата атындағы Қызылорда университетінің медиа орталығы