• 29 қазан 2026
• 25

ӘЛЕУМЕТТІК ЖҰМЫСТЫҢ ӨЗЕКТІ МӘСЕЛЕЛЕРІ ТАЛҚЫЛАНДЫ

Қорқыт ата атындағы Қызылорда университетінде Әлеуметтік қызметкерлер күніне орай «Әлеуметтік жұмыс: заманауи үрдістер, өзекті мәселелер және даму перспективалары» тақырыбында республикалық ғылыми-тәжірибелік конференция өтті.
Конференцияның мақсаты – әлеуметтік жұмыс саласындағы заманауи үрдістер мен өзекті мәселелерді талқылау, әлеуметтік қызмет көрсетудің тиімді әдістері мен инновациялық технологияларын зерделеу, ғылыми зерттеулер мен озық тәжірибелерді ортаға салу. Сондай-ақ кәсіби ынтымақтастықты нығайту арқылы әлеуметтік жұмыстың сапасы мен тиімділігін арттыру көзделді.
Іс-шараға жоғары оқу орындарының ғалымдары мен оқытушылары, әлеуметтік қызмет көрсету және жұмыспен қамту салаларының мамандары, орталық басшылары мен білім алушылар қатысты. Конференция модераторы – «Экономика және басқару» білім беру бағдарламасының жетекшісі, экономика ғылымдарының кандидаты Меруерт Умирзакова.

Конференция экономика ғылымдарының кандидаты, доцент Гүлмира Рысмаханованың құттықтау сөзімен басталды. Ол әлеуметтік қызметкерлердің қоғамдағы маңызды рөліне тоқталып, қатысушыларға конференция жұмысына сәттілік тіледі.
Жиын барысында «Нархоз» университетінің «Әлеуметтік жұмыс» білім беру бағдарламасының қауымдастырылған профессоры Кулзада Абенова, Л.Н. Гумилев атындағы Еуразия ұлттық университетінің «Әлеуметтану» кафедрасының аға оқытушысы Динара Досмурзаева, №1 арнаулы әлеуметтік қызмет көрсету орталығының директоры Раушан Ысқақова баяндама жасады.

Сонымен қатар Қызылорда облысының жұмыспен қамтуды үйлестіру және әлеуметтік бағдарламалар басқармасына қарасты «Оңалту орталығы» КММ директоры Манат Тлеуова, «Асыл Мирас» аутизм орталығының педагог-психологі Айтолқын Ақынбабаева, Еңбек мобильділігі орталығы КММ бөлім басшысы Абылай Самыратов және «Әлеуметтік жұмыс» білім беру бағдарламасының 2-курс студенті Сара Амангелді өз тәжірибелері мен зерттеу нәтижелерін таныстырды.
Баяндамаларда әлеуметтік қызмет көрсетудің заманауи тәсілдері, халықтың осал топтарын қолдау, оңалту жұмыстары, ерекше қажеттіліктері бар азаматтарға көмек көрсету, жұмыспен қамту және әлеуметтік сала мамандарын даярлау мәселелері қамтылды.
Конференция қорытындысында қатысушылар әлеуметтік жұмыс саласын одан әрі дамытуға бағытталған ұсыныс-пікірлерін білдіріп, өзара тәжірибе алмасты.

Қорқыт ата атындағы Қызылорда университетінің медиа орталығы