• 03 қараша 2026
• 53

КІТАПҚА ҚҰШТАР ҰРПАҚ – ҰЛТ БОЛАШАҒЫ

Қорқыт ата атындағы Қызылорда университетінде «Кітап оқитын ұлт» жобасы аясында «Кітап – білім мен руханияттың қайнар көзі» тақырыбында әдеби-танымдық кездесу өтті.

Басқосуға «Сыр жұлдыздары» балалар мен жасөспірімдерге арналған шығармашылық және инновация академиясының директоры, Халық кеңесінің мүшесі Жанар Бимұратқызы, «Кітап құрттары» клубының жетекшісі Ізбасар Әмір, «Қазақ тілі мен әдебиеті және журналистика»  білім беру бағдарламасының жетекшісі Гүлзира Оралова, аға оқытушы Айдынгүл Тойбазарқызы және ҚТӘ-24-5 оқу тобының студенттері қатысты.

Кездесу барысында кітаптың адам өміріндегі орны, оқырмандық талғамды қалыптастыру, шығарма таңдау ерекшеліктері және кітап оқуды күнделікті әдетке айналдыру жолдары талқыланды. Қонақтар өздерінің оқырмандық тәжірибелерімен бөлісіп, өмірлік көзқарастарына әсер еткен шығармалар туралы ой қозғады.

Сондай-ақ аудиокітаптың маңызы, классикалық әдебиетті оқу, бастаған кітапты соңына дейін жеткізу және шығармаларды бірлесе талқылаудың пайдасы жөнінде пікір алмасты. Университеттің профессор-оқытушылар құрамы мен студенттері де белсенділік танытып, сұрақтарын қойып, өз ой-пікірлерін ортаға салды.

Шара соңында қонақтар оқуға ұсынылатын кітаптармен бөлісіп, кітап оқуды тұрақты дағдыға айналдыруға қатысты пайдалы кеңестер берді.
Тағылымды басқосу қатысушыларға кітаптың рухани құндылығын тереңірек түсініп, оқырмандық мәдениет туралы ой бөлісуге мүмкіндік берді.

Қорқыт ата атындағы Қызылорда университетінің медиа орталығы