• 03 қараша 2026
• 54

БІЛІМ КӨКЖИЕГІН КЕҢЕЙТКЕН АКАДЕМИЯЛЫҚ ТӘЖІРИБЕ

Қорқыт ата атындағы Қызылорда университеті 2025 жылдан бастап Максим Танк атындағы Беларусь мемлекеттік педагогикалық университетімен бірлесіп, «Биология» білім беру бағдарламасын жүзеге асырып келеді. Қазіргі таңда Б-25-2м тобының магистранттары үшінші академиялық кезеңді серіктес университетте жалғастыруда.
Магистранттар алғашқы күндері университеттің құрылымымен, оқу ғимараттарымен танысып, жоғары оқу орнының тарихы, даму кезеңдері және білім беру үдерісін ұйымдастыру ерекшеліктері туралы мағлұмат алды. 
Максим Танк атындағы БМПУ проректоры  В.В. Радыгинамен өткен кездесуде алдағы оқу кезеңінің жоспары, бірлескен білім беру бағдарламасының мақсаттары мен академиялық мүмкіндіктері талқыланды. Кездесу екі университет арасындағы ғылыми-педагогикалық әріптестікті одан әрі нығайту жолдары жөнінде өзара пікір алмасумен жалғасты.

Университеттегі оқу үдерісі пәндік білім мен әдістемелік даярлықтың бірлігіне негізделген: магистранттар биология ғылымының өзекті мәселелерін меңгерумен қатар, оны мектепте оқытудың тиімді жолдарын да үйренеді.
Биологияны оқыту әдістемесі бойынша сабақтар практикаға бағытталған түрде ұйымдастырылады. Дәрістер мен семинарлардан бөлек, магистранттар зертханалық жұмыстарға, далалық зерттеулер мен оқу экскурсияларына қатысып, оларды мектеп оқушыларымен өткізудің әдістемесін меңгереді. 

Осы бағытта биологияны оқыту әдістемесі кафедрасының ұйымдастыруымен магистранттар «Зелёная» аумағындағы орманға далалық зерттеу сапарына шықты. Сапар барысында орман флорасымен танысып, өсімдіктердің алуан түрлілігін табиғи ортада бақылады. Зертханада жиналған өсімдік үлгілерінің анатомиялық құрылымдары қазақ жерінде өсетін өсімдіктермен салыстырмалы түрде талданды. Осылайша далалық бақылау мен зертханалық зерттеу ұштастырылып, магистранттардың теориялық білімі практикалық дағдылармен толықты. Сонымен қатар магистранттар мұндай жұмыстарды мектеп тәжірибесінде қалай ұйымдастыруға болатынын да көріп, әдістемелік тұрғыдан талдай алды.
Мұндай зерттеулер өсімдіктердің құрылымы мен тіршілік ерекшеліктерін тереңірек түсінуге, табиғи нысандарды ғылыми тұрғыда бақылауға және зерттеушілік құзыреттерді дамытуға мүмкіндік береді. Бұл дағдылар болашақ биология пәні мұғалімдері мен зерттеуші ғалымдар үшін аса маңызды.

Қорқыт ата атындағы Қызылорда университетінің медиа орталығы