• 04 қараша 2026
• 44

ШЕКАРАСЫЗ БІЛІМ: ПОЛЬШАДАҒЫ ЖАҢА ТӘЖІРИБЕ

Қорқыт ата атындағы Қызылорда университетінің 3-курс студенті Гүлназ Қуанышбек академиялық ұтқырлық бағдарламасы аясында Польшаның Лодзь қаласында білім алуда.
Мектеп кезінен шетелге шығып, өзге елдердің білім беру жүйесін тануға қызыққан студент үшін бұл бағдарлама жаңа білім мен тәжірибе жинауға, халықаралық ортада кәсіби дамуға және саяхаттауға жол ашты.
«Бағдарламаға қатысу үшін грант негізінде білім алу, GPA көрсеткішінің 3.0-ден жоғары болуы және ағылшын тілін меңгеру талап етілді. IELTS нәтижем 7.0 болғандықтан, университеттің тілдік тестілеуінен өту қажет болмады», – дейді Гүлназ.

   

Студенттің айтуынша, Польшадағы білім беру үдерісінің басты ерекшелігі – тәжірибеге бағытталуы. Кейбір пәндер бойынша дәстүрлі емтиханның орнына студенттер семестр бойы меңгерген білімдерін қорытындылап, жоба әзірлеп қорғайды. Сабақ барысында ашық пікір алмасуға, топтық жұмысқа және өз ойын еркін жеткізуге ерекше мән беріледі.
Гүлназға ерекше әсер қалдырған пәндердің бірі – Computer-Assisted Language Learning. Бұл пәнде заманауи технологиялар арқылы тілді үйрену мен үйретудің тиімді әдістері қарастырылады.
«Шетелде білім алу мамандығыма деген жауапкершілігімді арттырды. Кәсіби тұрғыда әлі де дамып, жетілдіретін тұстарым бар екенін түсіндім. Болашақта меңгерген тіл үйрету әдістерін Қазақстандағы мектептер мен білім беру курстарында қолданғым келеді», – дейді ол.

Гүлназ поляк халқының сабырлы өмір салтын және спортқа жақындығын да атап өтті. Лодзь қаласында таңғы және кешкі уақытта жүгірумен айналысатын тұрғындар көп, түрлі марафондар ұйымдастырылып тұрады. Бос уақытында студент жатақхана маңындағы кітапханаға барып, онлайн сабақтарын оқиды және табиғат аясында серуендейді.
Академиялық ұтқырлық бағдарламасы Гүлназға түрлі елдерден келген студенттермен танысуға мүмкіндік берді. Жапония, Қытай, Португалия, Түркия және басқа да мемлекеттердің жастарымен өткен мәдени кездесулер мен пикниктер оның студенттік өміріндегі есте қаларлық сәттердің біріне айналды.
«Бұл бағдарлама маған жаңа орта, тілдік тәжірибе, кәсіби даму және саяхаттау мүмкіндігін сыйлады. Бұрын өзімді тұйық адаммын деп ойлайтынмын. Алайда жаңа достар тауып, түрлі мәдениет өкілдерімен еркін қарым-қатынас орната алатынымды түсіндім», – дейді Гүлназ.

   

Шетелде оқуды жоспарлап жүрген студенттерге ол ағылшын тілін жетік меңгеруге, оқу үлгерімін жоғары деңгейде сақтауға және тәртіпке мән беруге кеңес береді.
«Тіл білу – ең маңызды негіз. Адамдармен қарым-қатынас орнату, достар табу және жаңа ортаға бейімделу тілдік деңгейге байланысты. Сонымен қатар GPA көрсеткішін 3.0-ден төмен түсірмей, білімге жауапкершілікпен қарау қажет», – дейді студент.
Гүлназ Қуанышбектің Польшадағы білім сапары – академиялық ұтқырлықтың сапалы білім алуға, кәсіби дамуға және жаңа мүмкіндіктерге жол ашатынының жарқын көрінісі.

Қорқыт ата атындағы Қызылорда университетінің медиа орталығы