• 05 қараша 2026
• 33

АНКАРА ӘЛЕУМЕТТІК ҒЫЛЫМДАР УНИВЕРСИТЕТІМЕН ЫНТЫМАҚТАСТЫҚ МӘСЕЛЕЛЕРІ ТАЛҚЫЛАНДЫ

Қорқыт ата атындағы Қызылорда университетінің Басқарма мүшесі – Академиялық мәселелер жөніндегі проректор Дана Абдрашева Анкара әлеуметтік ғылымдар университетінің ректоры, профессор, доктор Мұса Қазым Арыджан бастаған делегацияны қабылдады.
Кездесуге Басқарма мүшесі – Ғылыми жұмыстар және халықаралық байланыстар жөніндегі проректор Наргүл Сақтағанова, Академиялық мәселелер жөніндегі департамент директоры Ақмарал Бұхарбаева, Жасанды интеллект институтының директоры Нұрлан Құлмырзаев, Қожа Ахмет Ясауи атындағы Халықаралық қазақ-түрік университетінің вице-ректоры, доктор Мұстафа Гиритлиоғлу және делегация мүшелері мен университет өкілдері қатысты.

Жүздесу барысында Дана Абдрашева университеттің тарихы, білім беру бағыттары мен даму басымдықтары туралы ақпарат берді. Өз кезегінде профессор, доктор Мұса Қазым Арыджан Анкара әлеуметтік ғылымдар университетінің қызметімен таныстырып, Қызылорда қаласына және Қорқыт ата университетіне келгеніне қуанышты екенін жеткізді.
Тараптар екі жоғары оқу орны арасындағы академиялық және ғылыми ынтымақтастықты дамыту мүмкіндіктерін талқылады. Атап айтқанда, білім алушылар мен профессор-оқытушылар құрамының академиялық ұтқырлығын ұйымдастыру, бірлескен ғылыми зерттеулер жүргізу, қос дипломды білім беру бағдарламаларын әзірлеу бағыттарына назар аударды.

Анкара әлеуметтік ғылымдар университетінің ректоры магистратура мен докторантура деңгейлерінде қос дипломды бағдарламаларды жүзеге асыруға қызығушылық білдірді. Сонымен қатар Қорқыт ата мұрасын, оның тарихи-рухани маңызын кеңінен насихаттау мақсатында Қазақстан мен Түркияда халықаралық симпозиум ұйымдастыруды ұсынды.
Кездесуде жасанды интеллект, әлеуметтік ғылымдар және мәдени мұраны зерттеу бағыттарындағы ортақ ғылыми қызығушылықтар мен ықтимал жобалар да қарастырылды.
Кездесу соңында тараптар нақты ынтымақтастық бағыттарын айқындап, Қазақстан мен Түркия арасындағы білім және ғылым салаларындағы байланысты одан әрі нығайтуға дайын екендерін білдірді.

Қорқыт ата атындағы Қызылорда университетінің медиа орталығы