• 09 қараша 2026
• 16

ӘЛЕУМЕТТІК ҚЫЗМЕТКЕРЛЕР ЗАМАНАУИ КӘСІБИ ДАҒДЫЛАРЫН ЖЕТІЛДІРДІ

Қорқыт ата атындағы Қызылорда университеті мен Қызылорда облысының әкімдігі арасындағы әлеуметтік жұмыскерлерді даярлау, олардың біліктілігін арттыру бағытындағы ынтымақтастық туралы меморандум аясында «Әлеуметтік жұмыстың заманауи бағыттары» тақырыбында оқу-тәжірибелік курс өтті. 
Біліктілікті арттыру және қосымша білім беру орталығы ұйымдастырған курс Сырдария ауданы Отбасын қолдау орталығының әлеуметтік қызметкерлеріне арналды.  

Оқу бағдарламасын «Экономика және басқару» білім беру бағдарламасының аға оқытушылары, экономика ғылымдарының кандидаттары Меруерт Өмірзақова мен Алмакүл Әбдімомынова, экономика ғылымдарының магистрі Ұлжан Берікболова жүргізді.
Курс барысында әлеуметтік жұмыстың қазіргі даму үрдістері мен өзекті мәселелерін қамтитын дәрістер ұйымдастырылды. 

Атап айтқанда, «Әлеуметтік жұмыс және қазіргі мәселелер», «Әлеуметтік қызметтегі стандарттар мен мониторинг», «Әлеуметтік жұмыстағы кейс-менеджмент» сынды тақырыптарымен қатар, отбасымен және қарт адамдармен әлеуметтік жұмыс жүргізу, тұрмыстық және отбасылық зорлық-зомбылық жағдайларымен жұмыс мәселелері қарастырылды.
Курстың практикалық бөлімі Қызылорда облысының жұмыспен қамтуды үйлестіру және әлеуметтік бағдарламалар басқармасының қолдауымен Оңалту орталығында жалғасты.

Орталық басшысы Манат Тлеуова мен әлеуметтік жұмыс жөніндегі маман Ғалия Маханбетова тыңдаушыларды мекеменің қызмет бағыттарымен, әлеуметтік қызмет көрсету ерекшеліктерімен таныстырды.
Сондай-ақ оқу бағдарламасы аясындағы дәріс университет жанындағы Психологиялық қолдау орталығында өтті. Дәрісті магистр, аға оқытушы Сандігүл Дәрібаева жүргізіп, тыңдаушылар орталықтың қызметімен, көрсетілетін психологиялық қолдау түрлерімен танысты. 
Курсты Біліктілікті арттыру және қосымша білім беру орталығының басшысы Нұрхан Әбдіхалықов қорытындылап, тыңдаушыларға сертификаттар табыстады.

Қорқыт ата атындағы Қызылорда университетінің медиа орталығы