• 09 қараша 2026
• 44

ШЕКАРАСЫЗ БІЛІМ: АРМАНҒА ЖЕТЕЛЕГЕН ТАБАНДЫЛЫҚ

Қорқыт ата атындағы Қызылорда университеті Жасанды интеллект институтының «Ақпараттық жүйелер» білім беру бағдарламасының 3-курс студенті Абылайхан Шайхисламов академиялық ұтқырлық бағдарламасы аясында Польшада білім алуда. Ол шетелдегі оқу тәжірибесі, студенттік өмірдің ерекшеліктері мен арманына жету жолындағы ізденісі туралы әңгімеледі.
Абылайхан Еуропада білім алуды бала кезінен армандаған. Осы мақсатына жету үшін бірінші курстан бастап дайындалып, академиялық ұтқырлық бағдарламасының іріктеуіне бірнеше рет қатысқан. Табандылығының арқасында арманына қол жеткізіп, университет пен мемлекеттің қаржылық қолдауымен Польшада оқу мүмкіндігіне ие болды.
«Бұл менің шетелге алғашқы оқу сапарым емес. Сондықтан жаңа ортаға бейімделу аса қиын болған жоқ. Дегенмен Польшаның дамыған инфрақұрылымы мен адамдардың өмір салты ерекше әсер қалдырды. Мұндағы білім беру жүйесінде теориядан гөрі тәжірибеге, жобалар әзірлеуге және командалық жұмысқа басымдық беріледі. Бағалау жүйесі мен емтихан өткізу тәртібі де өзгеше», – дейді студент.

Абылайханның айтуынша, Польшадағы студенттік өмір еркіндікпен қатар үлкен жауапкершілікті талап етеді. Сабақтан кейінгі уақытты әркім өз қалауынша жоспарлап, ғылыми жобалармен айналысуға, білімін жетілдіруге немесе жаңа қалаларды аралауға мүмкіндік алады.
«Менімен бірге Батыс Еуропа, Қытай және Оңтүстік Америка елдерінен келген жастар білім алады. Мәдениетіміз бен көзқарасымыз әртүрлі болғанымен, ағылшын тілінде еркін сөйлесіп, бір-бірімізді жақсы түсінеміз. Бұл орта дүниетанымымды кеңейтіп, жаңа достар табуыма мүмкіндік берді», – деп бөлісті Абылайхан.
Шетелдегі өмір оған тек жаңа білім ғана емес, дербестік пен уақытты тиімді басқаруды да үйреткен. Алғашында оқу мен күнделікті тұрмысты қатар алып жүру қиындық туғызғанымен, нақты күн тәртібін қалыптастыру арқылы бәрін ретке келтірген.

«Польшада жеке уақыт пен кеңістікке ерекше құрметпен қарайды. Бұл маған оқу мен жеке өмір арасындағы тепе-теңдікті сақтаудың маңызын түсіндірді. Өз бетімше шешім қабылдауды, жауапкершілік алуды үйрендім. Сонымен қатар туған жерімнің жылуын, жақындарымды және өз ортамды бұрынғыдан да қатты бағалай бастадым», – дейді ол.
Академиялық ұтқырлық бағдарламасына қатысқысы келетін жастарға Абылайхан мүмкіндікті кейінге қалдырмай, мақсат жолында табандылық танытуға кеңес береді.
«Қорықпаңыздар және армандарыңызды кейінге қалдырмаңыздар! Мен де іріктеуден бірден өткен жоқпын. Бірақ әр талпынысым нәтижесіз қалмады. Алғашқы қорқыныш тез ұмытылады, ал жинаған тәжірибе мен өзіңе деген сенім өмір бойы сақталады».
Абылайхан үшін Польшадағы білім сапары – балалық арманының орындалуы ғана емес, жаңа мүмкіндіктерге жол ашқан маңызды кезең. Оның тәжірибесі мақсатқа жетуде табандылық пен үздіксіз ізденістің қаншалықты маңызды екенін көрсетеді.

Қорқыт ата атындағы Қызылорда университетінің медиа орталығы