• 13 қараша 2026
• 6

ҚАРЖЫГЕРЛЕР КҮНІНЕ ОРАЙ ҰЙЫМДАСТЫРЫЛҒАН АПТАЛЫҚ ҚОРЫТЫНДЫЛАНДЫ

Қорқыт ата атындағы Қызылорда университетінде 15 қараша – Ұлттық валюта және қаржыгерлер күніне орай ұйымдастырылған «Ұлттық теңге – қаржылық тәуелсіздік нышаны» апталығының жабылу рәсімі аясында студенттер арасында «Сақтандыру мәдениеті: өмірді, отбасын және бизнесті қорғаңыз» тақырыбында зияткерлік-практикалық олимпиада өтті.

Олимпиаданың негізгі мақсаты – студенттердің сақтандыру мәдениетін арттыру, тәуекелдерді бағалау және қаржылық қорғау тетіктерін ұсыну бойынша практикалық дағдыларын қалыптастыру.

Зияткерлік сайысқа «Қаржы» білім беру бағдарламасының 2, 3, 4-курс білім алушылары қатысты. Олимпиада үш кезеңнен тұрды. Қатысушылар «Сақтандыру стартапы», Kahoot викторинасы және «Сақтандыру детективі» кезеңдерінде өз білімдері мен біліктіліктерін ортаға салды.

Практикалық кезеңде студенттерге отбасының қаржылық қауіпсіздігі, бизнестегі өрт тәуекелі, агробизнестегі құрғақшылық, киберқауіптер және кәсіпкердің үшінші тұлғалар алдындағы жауапкершілігіне қатысты кейстік тапсырмалар ұсынылды. Қатысушылар тәуекелдерді анықтап, сақтандырудың тиімді түрлерін ұсынды. Сонымен қатар сақтандыру өнімдері бойынша стартап жобаларын әзірлеп, қорғады.

Олимпиаданың қазылар алқасының құрамында «Freedom Finance Insurance CK» АҚ Қызылорда облысы бойынша филиалы директорының орынбасары Салтанат Шакдат, «G.Global group» ЖШС директоры Гульдана Танатова және «Halyk Life» компаниясының Қызылорда облысы бойынша сату бөлімінің бас менеджері Гулмарал Аманова болды.

Іс-шараға «Қаржы, есеп және аудит» білім беру бағдарламасының жетекшісі, аға оқытушы Айгүл Макенова, экономика ғылымдарының кандидаты, аға оқытушы Құралай Серікқызы және экономика ғылымдарының магистрі, оқытушы Индира Жагипаролвна қатысты.

Олимпиада болашақ қаржыгерлердің теориялық білімін тәжірибемен ұштастыруға, сақтандыру саласындағы кәсіби құзыреттерін дамытуға және қаржылық сауаттылығын арттыруға мүмкіндік берді.

Қорқыт ата атындағы Қызылорда университетінің медиа орталығы