• 12 желтоқсан 2022
• 1300

Егін шаруашылығын әртараптандыру мәселелері талқыланды

Қорқыт ата атындағы Қызылорда университетінде «Климат және су ресурстары өзгеруі жағдайына қазақстандық Арал өңірі суармалы егіншілігін бейімдеу (адаптация) технологиясын шаруашылықтарға енгізу және тарату жобасы» бойынша ғылыми-тәжірибелік конференция өтті.

Конференцияға ғылыми жұмыстар және халықаралық байланыстар жөніндегі проректор Майнұр Бөрібаева қатысып, су тапшылығы жағдайында әртараптандыруды жүргізу үшін егіншілік мәдениетіне ғылымның озық жетістіктерін енгізу мәселелері талқыланды.

Арал-Сырдария бассейндік инспекция басшысы Сейілбек Нұрымбетов Қызылорда облысына 2022 жылдың вегетация кезеңіне белгіленген су пайдалану лимиті, Шардара су қоймасы мен Көксарай қарсы су реттегішінің жұмыс кестесіне тоқталды.

Жиында Қорқыт ата атындағы Қызылорда университетінің профессоры, техника ғылымдарының докторы Серікбай Өмірзақов су тапшылығы жағдайында күріш ауыспалы егістігінде мал азықтық дақылдарын өсіру технологиясы туралы айтты.

- Ұсынылып отырған технология бойынша жоңышқаны қант құмайымен бүркемелеп егу және ауыспалы егісте карталарға мозайкалық әдіспен орналастыру арқылы суармай-ақ, топырақ ылғалдылығын өсімдікке қолайлы режимде реттеу нәтижесінде бірінші орымның өзінде жақсы өнім алуға жол ашылады. Жобада аталған дақылдар учаскелік бас жаптардың ортасындағы танапта орналасуына байланысты бірде-бір рет суарылған жоқ. Наурыз айының 10-15 аралығында егілді. Жоңышқа өнуі, өсуі қант құмайымен бүркелемеудің арқасында жоғары өнім түзеді, – деді профессор.

Ғалымның айтуынша, бірінші орым 12 шілдеде жүргізіліп, 15 гектардан 1200 пресс жиналған.

Конференция барысында ғалымдар мен сала мамандары пікір алмасып, жаңа идеяларын ортаға салды.