• 21 желтоқсан 2022
• 1557

Жаңа монография жарық көрді

Қорқыт ата атындағы Қызылорда университетінде жаңа ғылыми еңбектің тұсауы кесілді. Монографияда құмай дақылдарының ерекшелігі, өсіру технологиясы, өнімділікті арттыру бағытындағы зерттеу нәтижелері енгізілген.

«Қазақстандық Арал өңірі жағдайында жоғары өнімді құмай агроценоздарын қалыптастырудың ғылыми негіздері» атты монографияның авторлары – ауылшаруашылығы ғылымдарының докторы, «Аграрлық технологиялар» кафедрасының профессоры Ибадулла Таутенов және «Аграрлық технологиялар» кафедрасының меңгерушісі, РhD Серік Бекжанов.

 Ғалымдар бұл бағытта зерттеу жұмыстарын 15 жылдан астам уақыт жүргізді.

- Монографияда өңіріміздегі ауылшаруашылық саласына жаңадан қосылған дақыл – қант құмайын өсіру технологиясы, әлемдегі дамуы жайлы мәліметтер баяндалған. Қант құмайы – әлемдік жылыну, су қорларының азаюына байланысты қазіргі кезде ауылшаруашылығында өте маңызды саналатын, тағамдық және малазықтық дақыл болып есептеледі. Бұл кітап шаруа қожалықтарының жоғары өнім алып, өз экономикасын көтеруіне жәрдем болады деген сенімдеміз, – деді ғалым Ибадулла Таутенов.

Ғылыми еңбек ауыл шаруашылығы саласының ғылыми қызметкерлері мен жұмысшыларына, ЖОО білім алушыларына, магистрант және докторанттарына арналған.

Монография Сыр бойының ауыл шаруашылығы өндірісінде жетекші кәсіпорын – «Абай-Дәулет» ЖШС-ның қаржылай демеушілігімен шығарылды.

Кітаптың тұсаукесер рәсіміне университеттің ғылыми жұмыстар және халықаралық байланыстар жөніндегі проректоры Майнұр Бөрібаева, «Абай-Дәулет» ЖШС директоры Марат Сәрсенбаев және профессор-оқытушылар мен білім алушылар қатысты.

Жиын барысында университет жанындағы «Korkyt Ata Endowment» корпоративтік қорының директоры Маржан Базарханова «Абай-Дәулет» ЖШС директоры Марат Сәрсенбаевқа Алғыс пен арнайы сыйлық табыстады.

Қорқыт ата атындағы Қызылорда университетінің медиа орталығы
Байланыс телефоны: 87242 26-21-34
e-mail: kmu.kmu@list.ru