• 03 ақпан 2023
• 936

Университет делегациясы Ұлыбритания-Қазақстан үкіметаралық комиссиясының жұмысына қатысты

ҚР Ғылым және жоғары білім министрі Саясат Нұрбек және қазақстандық 17 жоғары оқу орнынан келген делегация «Жоғары білім беру саласындағы мемлекеттер арасындағы ынтымақтастық арқылы мемлекетаралық қатынастарды нығайту» атты Ұлыбритания-Қазақстан 9-шы үкіметаралық комиссиясының жұмысына қатысты.

Министр Саясат Нұрбек британдық әріптестерін қазақстандық жоғары білім беру жүйесінің қазіргі даму тенденциялары туралы хабардар етті. Сондай-ақ ол Қазақстан үкіметі халықаралық әріптестікті кеңейту, елімізде шетелдік жоғары оқу орындарының филиалдарын ашу үшін барлық жағдайды жасап жатқанын атап өтті.

Қазақстандық жоғары оқу орындарынан келген делегация Лондонда Times Higher Education рейтинг агенттігінің өкілдерімен кездесті.

THE агенттігі оқыту, ғылыми зерттеу, білім беру, халықаралық перспективалар бағыттары бойынша 13 көрсеткішті негізге алып, тұрақты түрде ауқымды зерттеулер жүргізіп келеді. Оқу орындарының өкілдері жиында рейтингке қатысу мүмкіндіктерін талқылады.

Келесі кезекте Ұлыбританиядағы Қазақстан елшілігінде болып, «Болашақ» бағдарламасының стипендиаттарымен кездесті. Кездесу барысында ҚР Ғылым және жоғары білім министрі Саясат Нұрбек Қазақстандағы жоғары білім мен ғылым саласындағы тың жаңалықтарға тоқталып, білім алушылардың сұрақтарына жауап берді.

Сапар барысында Қорқыт ата атындағы Қызылорда университетінің делегациясы 1826 жылы құрылып, Лондонның бір бөлігіне айналған University College London оқу орнының жұмысымен танысты. Халықаралық рейтингтерде алдыңғы қатарда ойып орын алған, 30 Нобель сыйлығының лауреаттары шыққан университетпен келешекте Қорқыт ата атындағы Қызылорда университеті ғалымдарымен жоғары білім берудегі деколонизация тақырыбында бірлескен зерттеулер жүргізуге келісті.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
e-mail: kmu.kmu@list.ru