• 04 сәуір 2023
• 707

Халықаралық Түркі Академиясымен меморандумға қол қойылды

Қорқыт ата атындағы Қызылорда университеті мен Халықаралық Түркі Академиясы ынтымақтастық меморандумына қол қойды.
Қол қою рәсіміне Қорқыт ата атындағы Қызылорда университетінің Басқарма төрағасы – Ректоры Бейбіткүл Кәрімова, Халықаралық Түркі Академиясының вице-президенті Асхат Кесікбаев және академия сарапшысы Айсұлу Искандерова, профессор-оқытушылар қатысты.

Жиында Қорқыт ата атындағы Қызылорда университетінің Басқарма төрағасы – Ректоры Бейбіткүл Кәрімова меморандум ғылыми жұмыстарды бірлесіп атқаруға үлкен мүмкіндік беретінін атап өтті. 
Тараптар Қызылорда облысы Қазалы ауданындағы Сырдарияның төменгі сол жағалауында орналасқан көне Жанкент қаласында бірлескен археологиялық қазба жұмыстарын жүргізуге келісті.
Жанкент (Янгикент, Жаңақала, Шахаркент) көне елді мекенін қазіргі кезеңде зерттеуге Қорқыт ата атындағы Қызылорда университетінің Археология және этнография ғылыми-зерттеу орталығының қызметкерлері PhD Әзілхан Тәжекеевтің жетекшілігімен үлкен үлес қосқанын атап өту маңызды.

Жанкент қалашығына қазба жұмыстары неміс (Тюбинген Университеті) және ресейлік (РҒА Н.Н.Миклухо-Маклай атындағы Этнология және антропология институты) археологтарымен бірге бірнеше жыл қатарынан жүргізілді.

Археологиялық қазбалардың жаңа көкжиектері енді Халықаралық Түркі Академиясының қызметкерлерімен бірлесіп жүргізілмек.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
e-mail: kmu.kmu@list.ru