• 01 маусым 2023
• 1103

«Атамекен» балалар ауылындағы түлектерге білім гранты табысталды

1 маусым – халықаралық балаларды қорғау күніне орай «Атамекен» отбасы үлгісіндегі балалар ауылында «Көк аспанда күн күлсін, бірге күлсін бүлдіршін» атты мерекелік шара ұйымдастырылды.

Ынтымағы жарасқан ауылда «Байқоңыр», «Сарыарқа», «Үшқоңыр», «Ақжайық», «Ұлытау», «Оқжетпес», «Мадияр» отбасының балалары тату-тәтті ғұмыр кешуде.

Мерекелік жиында Қорқыт ата атындағы Қызылорда университетінің Әлеуметтік және тәрбие жұмыстары жөніндегі проректоры Жандос Базартай мектеп бітіруші түлектерге білім грантын табыстады. Грантты биыл ұлттық бірыңғай тестілеуге қатысатын Нұржан Омаров, Любовь Нестерова және Маржан Әуезханова, Меруерт Қожахмет иеленді.

˗ Қорқыт ата атындағы Қызылорда университеті жыл сайын дәстүрлі түрде «Атамекен» балалар ауылының  бітіруші түлектеріне білім грантын тағайындайды. Бұл – сапалы білім алып, бәсекеге қабілетті болып қалыптасуларыңызға берілген мүмкіндік. Білімді, мақсаты айқын жастар – еліміздің жарқын болашағы. Әрқашан биіктен көрініңіздер! – деді Жандос Нұртайұлы.

Сондай-ақ салтанатты шарада университетке бекітілген «Ақжайық» отбасының балаларына танымдық кітаптар сыйлыққа берілді.

Шарада білім грантының иегері, бітіруші түлек Маржан Әуезханова алдағы уақытта берілген мүмкіндікті тиімді пайдаланып, сапалы білім алатынын жеткізді.

Әлеуметтік жұмыс мамандықтарын даярлау мақсатында балалар ауылында университеттің «Экономика және басқару» кафедрасының филиалы жұмыс істейді. Сонымен қатар, оқу ордасының білім алушылары тәжірибеден өтуде. Профессор-оқытушылар тарапынан «Ақжайық» отбасының балаларына арнайы сыйлық та табысталды.

Жиында барлық отбасы балаларының жетістіктері таныстырылып, өздері дайындаған бұйымдарынан қолөнер көрмесін ұсынды.

Айта кету керек, мерекелік шараға қаладағы білім беру ұйымдарының өкілдері, демеушілер қатысты. Балалар ән айтып, би билеп өз өнерлерін көрсетті. Сонымен қатар, өлең шумақтарын оқып, ұлттық аспапта күй тартып, көрерменнің ыстық ықыласына бөленді.

Қорқыт ата атындағы Қызылорда университетінің медиа орталығы
Байланыс телефоны: 87242 26-21-34
e-mail: kmu.kmu@list.ru