• 02 маусым 2023
• 645

Ғылыми журналдар ребрендингі

Ширек ғасырлық тарихы бар «Қорқыт Ата атындағы Қызылорда университетінің Хабаршысы» журналы биыл жаңа форматқа көшті. Оның  құрылымындағы 8 ғылыми бағыт өз алдына отау тігіп, жаңа басылымдардың алғашқы сандары оқырманына жол тартты.

Атап айтқанда, Қорқыт Ата атындағы Қызылорда университетінің Хабаршысы «Ауыл шаруашылығы ғылымдары», «Экономика ғылыми сериясы», «Педагогика және психология», «Математика, физика және информатиканы оқытудың өзекті мәселелері», «Техника ғылымдары және технология», «Philological sciences journal», «Biological sciences journal», «Chemistry and chemical technology journal» деген атаулармен жарық көрді.

Басылымдардың барлығы ISSN PORTAL Халықаралық орталығынан Халықаралық стандартты сериялық нөмір (ISSN - International Standard Serial Number) иемденіп, ҚР Ақпарат және қоғамдық даму министрлігі, Ақпарат комитетінде тіркелді.

Ғылыми кадрлар даярлау және мемлекеттік ғылыми-технологиялық мәселелерді талқылау, дамыту мәселелеріне қызығушылық танытатын ғалымдардың тәжірибе алмасуы үшін ақпараттық кеңістік құру мақсатын көздейтін журналдардың ғылыми редакторлары университетіміздің жетекші ғалымдары. Ал, редакциялық құрамда алыс, жақын шет елдердің белгілі ғалымдары топтастырылған.

Ендігі меже – жаңа журналдарды Қазақстан Республикасы Ғылым және жоғары білім министрлігінің Ғылым және жоғары білім саласындағы сапаны қамтамасыз ету комитеті бекітетін басылымдар тізіміне қосу. Жаңаша жүйеде өз жұмысын бастаған басылымдар толықтай қолданыстағы талаптарға сәйкестендіріліп отыр. Көптеген міндеттер еңсерілді, десек те алда атқарылар шаруалар тізбегі одан да ауқымды.

Ең бастысы, ғылыми жарияланымдарымыздың экономика және қоғам сұраныстары үдесінен шығады деген үмітіміз зор.

Қорқыт ата атындағы Қызылорда университетінің медиа орталығы
Байланыс телефоны: 87242 26-21-34
e-mail: kmu.kmu@list.ru