• 24 қазан 2023
• 1120

Ғылыми кітапхананың жалпы қоры 2 миллионға жуықтайды

Елімізде 24 қазан – Кітапханашылар күні кәсіби мереке ретінде атап өтілуде. Бүгінде кітапханашылар – білім, ғылым, өнер мен мәдениеттің дамуына өлшеусіз үлес қосып, өркениетті елге айналуымыздың негізін қалауда.

Өңірлік коммуникациялар қызметінде өткен брифингте Қорқыт ата атындағы Қызылорда университетінің Ғылыми кітапхана жетекшісі Гүлмира Сәтбаева кітапхананың қызметіне тоқталып, жаңа бағыттағы жұмыстарды баяндады.

-Ғылыми кітапхана – университеттің оқу және ғылыми процестеріне, ақпараттық-кітапханалық қызмет көрсетудің сапасы мен оның нәтижелілігін арттыруға бағытталған. Кітапхана қызметін пайдаланушылардың басым бөлігі – университтің білім алушылары, профессор-оқытушылық құрам және университет қызметкерлері. Жыл сайын білім беру бағдарламаларының заманауи талаптарға сай жасақталуы үшін оқу құралдарымен, мерзімді басылымдармен және электрондық ресурстармен толықтырып келеміз. Бүгінде кітапхананың жалпы қоры – 1 956 324 дананы құрайды, - деді Гүлмира Әлібайқызы.

Айта кету керек, оқу орнында электронды кітаптардың саны артуда. Университеттің ғылыми кітапханасы AlemBook электронды кітапханасымен 5 жылға келісімшарт жасасты. Қазіргі таңда студенттер кез келген уақытта интернет арқылы AlemBook электронды кітапханасының кітаптарын тегін оқи алады.

Бүгінде университет кітапханаларын цифрландыру жұмысы қарқынды жалғасып келеді. Осы мақсатта  жоғары жылдамдықты Optima А2 сканері сатып алынып, оқу жылында 465 дана кітаптың электронды нұсқасы жасалды.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
e-mail: kmu.kmu@list.ru